ຕອນນີ້ ຄວາມຫາຍະນະຍິ່ງໃຫຍ່ຂຶ້ນເລື້ອຍໆ, ຜູ້ເຊື່ອຫຼາຍຄົນກໍຫວັງຢ່າງຍິ່ງທີ່ຈະຕ້ອນຮັບພຣະຜູ້ເປັນເຈົ້າ ເພື່ອພວກເຂົາຈະສາມາດຫຼົບໜີຈາກໄພພິບັດ ແລະ ເຂົ້າສູ່ອານາຈັກສະຫວັນ. ແຕ່ເມື່ອເວົ້າເຖິງການລໍຖ້າຕ້ອນຮັບການກັບຄືນມາຂອງພຣະຜູ້ເປັນເຈົ້າ, ທັດສະນະຄະຕິຂອງຜູ້ຄົນກໍແຕກຕ່າງກັນ. ບາງຄົນປະຕິບັດຕາມຄຳສັ່ງສອນຂອງພຣະຜູ້ເປັນເຈົ້າ. ພວກເຂົາເຝົ້າລະວັງ ແລະ ອະທິຖານ, ສະແຫວງຫາ ແລະ ສືບຄົ້ນຫາຢ່າງຫ້າວຫັນ ແລະ ເນັ້ນໃສ່ການຟັງສຽງຂອງເຈົ້າບ່າວ. ແຕ່ຄົນອື່ນໆ ຍັງຄົງຢູ່ໃນຄຣິສຕະຈັກຂອງພວກເຂົາ, ລໍຖ້າພຽງແຕ່ໃຫ້ພຣະຜູ້ເປັນເຈົ້າລົງມາເທິງກ້ອນເມກ. ພວກເຂົາເຮັດແບບນີ້ໂດຍອີງໃສ່ສິ່ງທີ່ອົງພຣະເຢຊູເຈົ້າໄດ້ກ່າວໄວ້ວ່າ: “ໃນທັນທີຫຼັງຈາກຄວາມລຳບາກຍາກແຄ້ນ (ຄວາມຫາຍະນະ) ຂອງມື້ເຫຼົ່ານັ້ນ, ດວງຕະເວັນຈະມືດມົວ ແລະ ດວງເດືອນຈະບໍ່ໃຫ້ແສງສະຫວ່າງ ແລະ ດວງດາວຈະຕົກລົງຈາກສະຫວັນ ແລະ ອຳນາດຂອງສະຫວັນຈະສັ່ນຄອນ: ແລ້ວຫຼັງຈາກນັ້ນ ໝາຍສຳຄັນແຫ່ງບຸດມະນຸດຈະປາກົດໃນສະຫວັນ ແລະ ຫຼັງຈາກນັ້ນ ທຸກຊົນເຜົ່າເທິງແຜ່ນດິນໂລກຈະໄວ້ທຸກ ແລະ ພວກເຂົາຈະເຫັນບຸດມະນຸດສະເດັດມາເທິງເມກແຫ່ງສະຫວັນດ້ວຍລິດອຳນາດ ແລະ ສະຫງ່າລາສີທີ່ຍິ່ງໃຫຍ່” (ມັດທາຍ 24:29-30). ພວກເຂົາຄິດວ່າ, “ຄຳທຳນາຍນີ້ແມ່ນພຣະຜູ້ເປັນເຈົ້າເອງເປັນຜູ້ກ່າວ. ພວກເຮົາກຳລັງລໍຖ້າຕ້ອນຮັບພຣະຜູ້ເປັນເຈົ້າ ໂດຍການເຝົ້າເບິ່ງພຣະອົງລົງມາເທິງກ້ອນເມກ. ມີຫຍັງຜິດໃນເລື່ອງນັ້ນ?”

ມັນບໍ່ມີຫຍັງຜິດໃນການຕ້ອນຮັບພຣະຜູ້ເປັນເຈົ້າ ໂດຍອີງໃສ່ຄຳທຳນາຍໃນພຣະຄຳພີ, ແຕ່ມັນຍາກທີ່ຈະເວົ້າວ່າ ການລໍຖ້າໃຫ້ພຣະຜູ້ເປັນເຈົ້າລົງມາເທິງກ້ອນເມກນັ້ນ ສອດຄ່ອງກັບເຈດຕະນາຂອງພຣະເຈົ້າຢ່າງແທ້ຈິງ ຫຼື ບໍ່, ເພາະອົງພຣະເຢຊູເຈົ້າໄດ້ທຳນາຍເປັນຫຼັກວ່າ ການກັບຄືນມາຂອງພຣະອົງຈະເປັນໃນຖານະບຸດມະນຸດ, ມາຢ່າງລັບໆ. ຕົວຢ່າງ: ອົງພຣະເຢຊູເຈົ້າໄດ້ທຳນາຍວ່າ: “ດ້ວຍວ່າ ຟ້າແມບເຫຼື້ອມຈາກທິດຕາເວັນອອກ ຍັງເຫຼື້ອມໄປເຖິງທິດຕາເວັນຕົກ, ການສະເດັດມາຂອງບຸດມະນຸດກໍຈະເປັນດັ່ງນັ້ນ” (ມັດທາຍ 24:27). “ໃນຍຸກຂອງໂນອາເປັນແບບໃດນັ້ນ ການມາຂອງບຸດມະນຸດກໍຈະເປັນແບບນັ້ນເຊັ່ນກັນ” (ມັດທາຍ 24:37). “ຍ້ອນຟ້າແມບເຫຼື້ອມ ທີ່ສ່ອງແສງຈາກດ້ານໜຶ່ງຂອງສະຫວັນ, ສ່ອງໄປສູ່ອີກດ້ານໜຶ່ງຂອງໃຕ້ສະຫວັນ; ບຸດມະນຸດກໍຈະເປັນດັ່ງນັ້ນໃນມື້ຂອງພຣະອົງ. ແຕ່ກ່ອນອື່ນ ພຣະອົງຕ້ອງທົນທຸກກັບຫຼາຍສິ່ງ ແລະ ຖືກປະຕິເສດໂດຍຄົນຮຸ່ນນີ້” (ລູກາ 17:24-25). ອົງພຣະເຢຊູເຈົ້າຍັງໄດ້ທຳນາຍອີກວ່າ: “ສະນັ້ນ ພວກເຈົ້າຈົ່ງກຽມພ້ອມນໍາຍ້ອນບຸດມະນຸດຈະມາໃນເວລາທີ່ພວກເຈົ້າຄິດບໍ່ເຖິງ” (ມັດທາຍ 24:44). “ແລ້ວໃນເວລາທ່ຽງຄືນ ກໍມີສຽງຮ້ອງມາວ່າ, ເບິ່ງແມ, ເຈົ້າບ່າວມາແລ້ວ ພວກເຈົ້າຈົ່ງອອກໄປພົບກັບພຣະອົງ” (ມັດທາຍ 25:6). ຄຳທຳນາຍເຫຼົ່ານີ້ກ່າວເຖິງ “ບຸດມະນຸດຈະມາ” ຫຼື “ການມາຂອງບຸດມະນຸດ”. ຄໍາວ່າ “ບຸດມະນຸດ” ໝາຍເຖິງ ຜູ້ທີ່ເກີດຈາກມະນຸດ. ເວົ້າອີກຢ່າງໜຶ່ງກໍຄື ພຣະເຈົ້າຈະສວມໃສ່ເນື້ອໜັງ ແລະ ກາຍເປັນຄົນທຳມະດາ ແລະ ປົກກະຕິ, ລົງມາທ່າມກາງມະນຸດຊາດຢ່າງລັບໆ ເພື່ອກ່າວ ແລະ ເຮັດພາລະກິດ. ນີ້ແມ່ນແຕກຕ່າງຢ່າງສິ້ນເຊີງຈາກການປາກົດຕົວຢ່າງເປີດເຜີຍເທິງກ້ອນເມກ. ດ້ວຍຄຳທຳນາຍຫຼາຍຢ່າງ ກ່ຽວກັບການກັບຄືນມາຂອງພຣະຜູ້ເປັນເຈົ້າໃນຖານະບຸດມະນຸດ, ເປັນຫຍັງໂລກສາສະໜາຈຶ່ງເລືອກທີ່ຈະເນັ້ນໃສ່ພຽງແຕ່ຄຳທຳນາຍກ່ຽວກັບການລົງມາຂອງພຣະອົງເທິງກ້ອນເມກເທົ່ານັ້ນ? ເປັນຫຍັງພວກເຂົາຈຶ່ງບໍ່ສົນໃຈຄຳທຳນາຍກ່ຽວກັບການມາຂອງບຸດມະນຸດ, ກ່ຽວກັບການລົງມາຂອງບຸດມະນຸດເລີຍ? ມັນມີຫຼາຍຢ່າງໃນເລື່ອງນີ້, ຫຼາຍກວ່າທີ່ຕາເບິ່ງເຫັນ.

ກ່ອນອື່ນ, ພວກເຮົາຕ້ອງເຂົ້າໃຈ ຄວາມແຕກຕ່າງທີ່ໃຫຍ່ທີ່ສຸດລະຫວ່າງຄຳທຳນາຍຂອງພຣະຜູ້ເປັນເຈົ້າທີ່ວ່າ “ບຸດມະນຸດຈະມາ” ແລະ “ເຈົ້າບ່າວມາ” ແລະ ຄຳທຳນາຍກ່ຽວກັບການລົງມາຂອງພຣະອົງເທິງກ້ອນເມກ. ພວກເຮົາຕ້ອງເຫັນຢ່າງຊັດເຈນວ່າ ເວລາ ແລະ ບໍລິບົດຂອງຄຳທຳນາຍສອງປະເພດນີ້ແມ່ນແຕກຕ່າງກັນຢ່າງສິ້ນເຊີງ. ບໍລິບົດສຳລັບການມາຂອງບຸດມະນຸດແມ່ນຫຍັງ? ອົງພຣະເຢຊູເຈົ້າໄດ້ທຳນາຍວ່າ: “ໃນຍຸກຂອງໂນອາເປັນແບບໃດນັ້ນ ການມາຂອງບຸດມະນຸດກໍຈະເປັນແບບນັ້ນເຊັ່ນກັນ” (ມັດທາຍ 24:37). ໃນຍຸກຂອງໂນອາ, ຜູ້ຄົນກິນ, ດື່ມ, ແຕ່ງດອງ ແລະ ຈັດແຈງການແຕ່ງດອງ. ບໍລິບົດຂອງການມາຂອງບຸດມະນຸດເຫັນໄດ້ຢ່າງຊັດເຈນວ່າ ບໍ່ແມ່ນໃນໄລຍະທີ່ເກີດຄວາມຫາຍະນະໃຫຍ່, ແຕ່ແມ່ນໃນໄລຍະທີ່ຊີວິດປົກກະຕິກ່ອນທີ່ໄພພິບັດຈະມາເຖິງ. ແຕ່ການລົງມາເທິງກ້ອນເມກນັ້ນ ຈະເກີດຂຶ້ນຫຼັງຈາກຄວາມຫາຍະນະໃຫຍ່. ສະນັ້ນ, ອົງພຣະເຢຊູເຈົ້າຈຶ່ງມັກກ່າວວ່າ “ພວກເຈົ້າຕ້ອງເຝົ້າລະວັງ ແລະ ກຽມນ້ຳມັນຂອງພວກເຈົ້າເພື່ອຕ້ອນຮັບພຣະຜູ້ເປັນເຈົ້າ”. ນີ້ໝາຍເຖິງການຕ້ອນຮັບບຸດມະນຸດທີ່ບັງເກີດເປັນເນື້ອໜັງກ່ອນຄວາມຫາຍະນະ. ພຣະອົງຍັງໄດ້ທຳນາຍເຖິງຜົນໄດ້ຮັບທີ່ແຕກຕ່າງກັນສຳລັບຍິງສາວບໍລິສຸດທີ່ສະຫຼາດ ແລະ ທີ່ໂງ່ຈ້າ. ຄົນເຫຼົ່ານັ້ນທີ່ຕ້ອນຮັບບຸດມະນຸດທີ່ບັງເກີດເປັນເນື້ອໜັງກ່ອນຄວາມຫາຍະນະ ແມ່ນຍິງສາວບໍລິສຸດທີ່ສະຫຼາດ. ຍິງສາວບໍລິສຸດທີ່ສະຫຼາດເຫຼົ່ານີ້ເຂົ້າຮ່ວມງານລ້ຽງຂອງອານາຈັກສະຫວັນ ແລະ ສາມາດປະສົບກັບການພິພາກສາຕໍ່ໜ້າບັນລັງຂອງພຣະຄຣິສ ເພື່ອຖືກເຮັດໃຫ້ບໍລິສຸດ. ພວກເຂົາຖືກເຮັດໃຫ້ກາຍເປັນຜູ້ມີໄຊຊະນະ ແລະ ເຂົ້າສູ່ອານາຈັກຂອງພຣະເຈົ້າ. ແຕ່ຄົນທາງສາສະໜາທີ່ຢືນຢັນທີ່ຈະລໍຖ້າໃຫ້ພຣະຜູ້ເປັນເຈົ້າລົງມາເທິງກ້ອນເມກ ເພື່ອຕ້ອນຮັບພຣະອົງ ແມ່ນຍິງສາວບໍລິສຸດທີ່ໂງ່ຈ້າ. ຜົນຕາມມາຈະເປັນແນວໃດສຳລັບຄົນທີ່ລໍຖ້າທີ່ຈະເຫັນພຣະຜູ້ເປັນເຈົ້າລົງມາເທິງກ້ອນເມກ? ມັນແມ່ນຜົນໄດ້ຮັບທີ່ວ່າ “ທຸກຊົນຊາດເທິງແຜ່ນດິນໂລກນີ້ຈະຮ້ອງໄຫ້ຍ້ອນພຣະອົງ”. ສິ່ງນີ້ໝາຍຄວາມຢ່າງຊັດເຈນວ່າພວກເຂົາພາດໂອກາດທີ່ຈະຕ້ອນຮັບບຸດມະນຸດທີ່ບັງເກີດເປັນເນື້ອໜັງ ແລະ ຖືກພິພາກສາ, ຖືກປະນາມ ແລະ ຖືກລົງໂທດ. ມັນເປັນຄືກັບໂທມາ, ຜູ້ທີ່ຍອມຮັບວ່າອົງພຣະເຢຊູເຈົ້າເປັນພຣະຜູ້ເປັນເຈົ້າ ແລະ ພຣະຄຣິສ ກໍຕໍ່ເມື່ອລາວເຫັນຮ່າງກາຍຝ່າຍວິນຍານຂອງພຣະອົງປາກົດຂຶ້ນເທົ່ານັ້ນ. ຍ້ອນສິ່ງນີ້, ລາວຈຶ່ງຖືກປະນາມໂດຍພຣະຜູ້ເປັນເຈົ້າ. ດັ່ງທີ່ອົງພຣະເຢຊູເຈົ້າໄດ້ກ່າວວ່າ: “ຍ້ອນເຈົ້າໄດ້ເຫັນເຮົາ ເຈົ້າຈຶ່ງເຊື່ອ: ພອນຈົ່ງມີແກ່ພວກເຂົາທີ່ບໍ່ໄດ້ເຫັນ ແຕ່ໄດ້ເຊື່ອ” (ໂຢຮັນ 20:29). ຈາກສິ່ງນີ້, ພວກເຮົາສາມາດເຫັນໄດ້ວ່າ ຜົນໄດ້ຮັບຂອງຜູ້ທີ່ຕ້ອນຮັບພຣະຜູ້ເປັນເຈົ້າກ່ອນຄວາມຫາຍະນະ ແລະ ຜູ້ທີ່ຕ້ອນຮັບພຣະອົງຫຼັງຈາກນັ້ນ ແມ່ນແຕກຕ່າງກັນຢ່າງສິ້ນເຊີງ. ເຈດຕະນາຂອງພຣະຜູ້ເປັນເຈົ້າແມ່ນເພື່ອໃຫ້ຜູ້ຄົນຕ້ອນຮັບພຣະອົງກ່ອນຄວາມຫາຍະນະ ແລະ ບໍ່ແມ່ນຫຼັງຈາກຄວາມຫາຍະນະໃຫຍ່ໄດ້ສິ້ນສຸດລົງຢ່າງແນ່ນອນ.

ບາດນີ້ ໃຫ້ມາເວົ້າເຖິງຄວາມໝາຍຂອງການຕ້ອນຮັບພຣະຜູ້ເປັນເຈົ້າກ່ອນຄວາມຫາຍະນະ. ພຣະເຢຊູເຈົ້າຊົງກ່າວໄວ້ວ່າ: “ເຮົາຍັງມີຫລາຍສິ່ງທີ່ຈະບອກພວກເຈົ້າ ແຕ່ໃນເວລານີ້ພວກເຈົ້າອາດຈະບໍ່ສາມາດທົນໄດ້. ເຖິງຢ່າງໃດກໍຕາມເມື່ອພຣະອົງ ຜູ້ເປັນພຣະວິນຍານແຫ່ງຄວາມຈິງ ສະເດັດມາ, ພຣະອົງຈະນຳທາງພວກເຈົ້າໄປສູ່ຄວາມຈິງທັງໝົດ” (ໂຢຮັນ 16:12-13). ໜັງສືພຣະນິມິດຍັງໄດ້ທຳນາຍໄວ້ອີກວ່າ: “ເບິ່ງແມ້, ເຮົາຢືນຢູ່ທີ່ປະຕູ ແລະ ເຄາະປະຕູຢູ່: ຖ້າຜູ້ໃດໄດ້ຍິນສຽງຂອງເຮົາ ແລະ ເປີດປະຕູ, ເຮົາຈະເຂົ້າໄປຫາຜູ້ນັ້ນ ແລະ ຈະກິນເຂົ້າກັບຜູ້ນັ້ນ ແລະ ຜູ້ນັ້ນກໍຈະກິນເຂົ້າກັບເຮົາ” (ພຣະນິມິດ 3:20). “ຜູ້ທີ່ໄດ້ຮັບໄຊຊະນະ, ເຮົາຈະປະທານໃຫ້ຜູ້ນັ້ນໄດ້ນັ່ງກັບເຮົາເທິງບັນລັງຂອງເຮົາ, ເຊັ່ນດຽວກັບທີ່ເຮົາໄດ້ຮັບໄຊຊະນະ ແລະ ນັ່ງຢູ່ກັບພຣະບິດາຂອງເຮົາເທິງບັນລັງຂອງພຣະອົງ” (ພຣະນິມິດ 3:21). ຈາກຄຳທຳນາຍເຫຼົ່ານີ້, ພວກເຮົາສາມາດເຫັນໄດ້ວ່າ ກ່ອນຄວາມຫາຍະນະ, ພຣະຜູ້ເປັນເຈົ້າຈະດຳເນີນພາລະກິດຂັ້ນຕອນໜຶ່ງ: ນັ້ນກໍຄືພາລະກິດແຫ່ງການພິພາກສາໂດຍເລີ່ມຕົ້ນຈາກເຮືອນຂອງພຣະເຈົ້າ. ນີ້ໝາຍຄວາມວ່າ ກ່ອນຄວາມຫາຍະນະ, ພຣະຜູ້ເປັນເຈົ້າຈະສະແດງຄວາມຈິງ ແລະ ເຮັດພາລະກິດແຫ່ງການພິພາກສາ ເພື່ອເຮັດໃຫ້ກຸ່ມຄົນບໍລິສຸດ ແລະ ຊ່ວຍພວກເຂົາໃຫ້ລອດພົ້ນ ແລະ ເຮັດໃຫ້ພວກເຂົາກາຍເປັນຜູ້ມີໄຊຊະນະ. ຜູ້ມີໄຊຊະນະທີ່ຖືກທຳນາຍໄວ້ໃນໜັງສືພຣະນິມິດນັ້ນ ຢ່າງບໍ່ຕ້ອງສົງໄສເລີຍ ກໍແມ່ນ ຜູ້ທີ່ຖືກເຮັດໃຫ້ສົມບູນກ່ອນ ຫຼື ໃນລະຫວ່າງຄວາມຫາຍະນະ. ພວກເຮົາທຸກຄົນເຄີຍໄດ້ຍິນໃນອະດີດວ່າ ເມື່ອຄວາມຫາຍະນະໃຫຍ່ເລີ່ມຕົ້ນຂຶ້ນ, ປະຕູແຫ່ງຄວາມລອດພົ້ນກໍຈະປິດລົງ. ນັ້ນກໍຄື, ພາລະກິດແຫ່ງຄວາມລອດພົ້ນຂອງພຣະເຈົ້າຈະສຳເລັດລົງຢ່າງສົມບູນ. ສະນັ້ນ, ຖ້າພວກເຮົາລໍຖ້າໃຫ້ພຣະຜູ້ເປັນເຈົ້າລົງມາເທິງກ້ອນເມກ, ເຊິ່ງຈະເກີດຂຶ້ນໃນຕອນທ້າຍຂອງຄວາມຫາຍະນະ, ພຣະເຈົ້າຍັງຈະສາມາດເຮັດພາລະກິດແຫ່ງຄວາມລອດພົ້ນໄດ້ຢູ່ບໍ? ນັ້ນເປັນໄປບໍ່ໄດ້. ດັ່ງທີ່ພຣະທຳຂອງພຣະເຈົ້າອົງຊົງລິດທານຸພາບສູງສຸດກ່າວວ່າ: “ຄົນຈຳນວນຫຼາຍອາດຈະບໍ່ສົນໃຈສິ່ງທີ່ເຮົາເວົ້າ ແຕ່ເຮົາຍັງຢາກບອກທຸກຄົນທີ່ອ້າງຕົນວ່າເປັນໄພ່ພົນ ຜູ້ທີ່ຕິດຕາມພຣະເຢຊູວ່າ ເມື່ອພວກເຈົ້າເຫັນພຣະເຢຊູລົງມາຈາກສະຫວັນເທິງເມກສີຂາວດ້ວຍຕາຂອງພວກເຈົ້າເອງ ນີ້ຈະເປັນເວລາທີ່ດວງອາທິດແຫ່ງຄວາມຊອບທຳປາກົດຕົວຢ່າງເປີດເຜີຍ. ບາງທີນັ້ນອາດຈະເປັນເວລາທີ່ຕື່ນເຕັ້ນຫຼາຍແຮງສຳລັບເຈົ້າ. ເຖິງຢ່າງໃດກໍຕາມ ເຈົ້າຄວນຮູ້ວ່າເວລາທີ່ເຈົ້າເຫັນພຣະເຢຊູລົງມາຈາກສະຫວັນດ້ວຍຕາຂອງເຈົ້າ ນັ້ນກໍຈະເປັນເວລາທີ່ເຈົ້າລົງໄປນະຮົກເພື່ອຮັບການລົງໂທດ ເຊິ່ງເປັນເວລາທີ່ການສິ້ນສຸດແຜນການຄຸ້ມຄອງຂອງພຣະເຈົ້າຖືກປະກາດອອກໄປ ແລະ ເມື່ອພຣະເຈົ້າໃຫ້ລາງວັນຄົນດີ ແລະ ລົງໂທດຄົນຊົ່ວຊ້າ. ເພາະວ່າການພິພາກສາຂອງພຣະເຈົ້າຈະໄດ້ສິ້ນສຸດລົງແລ້ວກ່ອນທີ່ມະນຸດຈະເຫັນໝາຍສຳຄັນ ເມື່ອມີພຽງແຕ່ການສະແດງອອກເຖິງຄວາມຈິງເທົ່ານັ້ນ. ຜູ້ທີ່ຍອມຮັບຄວາມຈິງ ແລະ ບໍ່ສະແຫວງຫາໝາຍສຳຄັນ ແລະ ດ້ວຍເຫດນີ້ຈຶ່ງໄດ້ຮັບການຊຳລະໃຫ້ບໍລິສຸດ ຈະຖືກນຳມາຢູ່ຕໍ່ໜ້າບັນລັງຂອງພຣະເຈົ້າ ແລະ ເຂົ້າສູ່ອ້ອມກອດຂອງພຣະຜູ້ສ້າງ. ມີພຽງຜູ້ທີ່ຍຶດໝັ້ນໃນຄວາມເຊື່ອທີ່ວ່າ ‘ພຣະເຢຊູຜູ້ທີ່ບໍ່ໄດ້ຂີ່ເມກສີຂາວແມ່ນພຣະຄຣິສປອມ’ ເທົ່ານັ້ນທີ່ຈະຕ້ອງຮັບການລົງໂທດຊົ່ວນິລັນດອນ ເພາະພວກເຂົາເຊື່ອພຽງແຕ່ໃນພຣະເຢຊູຜູ້ທີ່ສະແດງໝາຍສຳຄັນ ແຕ່ບໍ່ຍອມຮັບຮູ້ພຣະເຢຊູຜູ້ທີ່ສະແດງອອກເຖິງການພິພາກສາທີ່ຮຸນແຮງ ແລະ ປົດປ່ອຍຊີວິດ ແລະ ຫົນທາງທີ່ແທ້ຈິງ. ດ້ວຍເຫດນີ້ ມັນຈຶ່ງເປັນໄດ້ພຽງແຕ່ວ່າພຣະເຢຊູຈັດການກັບພວກເຂົາ ເມື່ອພຣະອົງກັບມາຢ່າງເປີດເຜີຍເທິງເມກສີຂາວ” (ພຣະທຳ, ເຫຼັ້ມທີ 1. ການປາກົດຕົວ ແລະ ພາລະກິດຂອງພຣະເຈົ້າ. ເວລາທີ່ເຈົ້າເຫັນຮ່າງກາຍຝ່າຍວິນຍານຂອງພຣະເຢຊູ, ພຣະເຈົ້າຈະໄດ້ສ້າງສະຫວັນ ແລະ ແຜ່ນດິນໂລກຂຶ້ນໃໝ່ແລ້ວ). ພຣະທຳຂອງພຣະເຈົ້າອົງຊົງລິດທານຸພາບສູງສຸດແມ່ນຊັດເຈນທີ່ສຸດ. ພວກເຮົາສາມາດເວົ້າໄດ້ຢ່າງໝັ້ນໃຈວ່າ ທຸກຄົນທີ່ຍຶດໝັ້ນວ່າຈະຕ້ອນຮັບພຣະຜູ້ເປັນເຈົ້າ ກໍຕໍ່ເມື່ອພຣະອົງລົງມາເທິງກ້ອນເມກຫຼັງຈາກຄວາມຫາຍະນະແລ້ວເທົ່ານັ້ນ ຈະພົບກັບຄວາມວິບັດ, ເພາະວ່າພວກເຂົາຈະສູນເສຍໂອກາດທີ່ຈະຍອມຮັບການພິພາກສາ, ຖືກເຮັດໃຫ້ບໍລິສຸດ ແລະ ໄດ້ຮັບຄວາມລອດພົ້ນ. ພວກເຂົາຈະສູນເສຍໂອກາດທີ່ຈະຍອມຮັບຄວາມຈິງທີ່ຖືກສະແດງອອກ ແລະ ພາລະກິດແຫ່ງການພິພາກສາທີ່ເຮັດໂດຍພຣະວິນຍານແຫ່ງຄວາມຈິງ. ພວກເຂົາຈະບໍ່ມີໂອກາດໄດ້ເຫັນພຣະພັກຂອງພຣະເຈົ້າຈັກເທື່ອ.

ໄພພິບັດໄດ້ເລີ່ມຕົ້ນຂຶ້ນແລ້ວ. ພາລະກິດຂອງພຣະເຈົ້າໃນການຊ່ວຍມະນຸດໃຫ້ລອດພົ້ນໃກ້ຈະສິ້ນສຸດລົງແລ້ວ ແລະ ຫຼັງຈາກນັ້ນ ພວກເຮົາຈະເຂົ້າສູ່ສາມປີເຄິ່ງສຸດທ້າຍຂອງຄວາມຫາຍະນະໃຫຍ່. ນັ້ນຈະເປັນຄວາມຫາຍະນະໃຫຍ່ທີ່ຈະທຳລາຍລ້າງມະນຸດຊາດຢ່າງສົມບູນ. ມັນເປັນອັນຕະລາຍທີ່ສຸດທີ່ຈະຍັງບໍ່ໄດ້ຕ້ອນຮັບພຣະຜູ້ເປັນເຈົ້າໃນຕອນນີ້; ເຈົ້າອາດຈະສູນເສຍຊີວິດຂອງເຈົ້າໄດ້ທຸກເວລາ. ມັນເປັນເລື່ອງທີ່ໂງ່ຈ້າທີ່ສຸດທີ່ບໍ່ສະແຫວງຫາ ແລະ ສືບຄົ້ນຫາຫົນທາງທີ່ແທ້ຈິງ ແລະ ຍອມຮັບຄວາມຈິງທັງໝົດທີ່ “ບຸດມະນຸດ” ໄດ້ສະແດງອອກ. ຄົນເຫຼົ່ານີ້ເປັນຍິງສາວບໍລິສຸດທີ່ໂງ່ຈ້າຢ່າງແນ່ນອນ ແລະ ມີແຕ່ຈະຖືກປະຖິ້ມ ແລະ ຖືກກຳຈັດໂດຍພຣະຜູ້ເປັນເຈົ້າເທົ່ານັ້ນ. ພວກເຮົາສາມາດເວົ້າໄດ້ວ່າ ການຕ້ອນຮັບພຣະຜູ້ເປັນເຈົ້າໃນຕອນນີ້ແມ່ນເລື່ອງທີ່ຮີບດ່ວນທີ່ສຸດ. ການທີ່ເຈົ້າຈະສາມາດຕ້ອນຮັບພຣະຜູ້ເປັນເຈົ້າກ່ອນຄວາມຫາຍະນະໃຫຍ່ທີ່ຈະທຳລາຍມະນຸດຊາດໄດ້ ຫຼື ບໍ່ ແລະ ຍອມຮັບການພິພາກສາຂອງພຣະເຈົ້າໃນຍຸກສຸດທ້າຍເພື່ອຖືກເຮັດໃຫ້ບໍລິສຸດນັ້ນ ຈະກຳນົດຜົນໄດ້ຮັບຂອງເຈົ້າໃນຄວາມຫາຍະນະໃຫຍ່ໂດຍກົງວ່າ: ມີຊີວິດ ຫຼື ຕາຍ!